পৃথিৱীৰ পৃষ্ঠভাগৰ প্ৰায় ৭১ শতাংশ পানীয়ে আগুৰি আছে৷ এতিয়ালৈকে আৱিষ্কৃত সকলোধৰণৰ জীৱৰ জীৱন ধাৰণৰ বাবে পানী অপৰিহাৰ্য৷ পৃথিৱীৰ ৯৬.৫ শতাংশ পানী সাগৰ আৰু মহাসাগৰসমূহত, ১.৭ শতাংশ ভূমিৰ আভ্যন্তৰত, ১.৭ শতাংশ এণ্টাৰ্কটিকা আৰু গ্ৰীণলেণ্ডৰে হিমখণ্ডত আৰু ০.০০১ শতাংশ বাষ্প অথবা ডাৱৰৰ ৰূপত পোৱা যায়৷ পৃথিৱীৰ পানীভাগৰ ২.৫ শতাংশহে সতেজ পানী আৰু বাকী ৯৮.৮ শতাংশ বৰফ আকাৰে আৰু ভূমিৰ আভ্যন্তৰত জমা হৈ আছে৷ সতেজ পানীভাগৰ ০.৩ শতাংশতকৈয়ো কম অংশ নদী,  হ্ৰদ আৰু আমাৰ চাৰিওফালৰে পৰিৱেশত নিহিত হৈ থাকে৷ তাতোতকৈয়ো কম একাংশ পানী জীৱদেহ আৰু অন্যান্য সামগ্ৰীত নিহিত হৈ থাকে৷

পৃথিৱীৰ পানীভাগৰ জলস্তৰৰ যোগেদি অহৰহ ৰূপান্তৰ ঘটি থাকে৷ সাগৰ মহাসাগৰ,  নদী হ্ৰদৰ পানী সূৰ্যৰ তাপত শুকাই জলীয় বাষ্পৰ ৰূপত আকাশলৈ উৰি যায়৷ এই বাষ্পই ঘণীভূত হৈ ডাৱৰৰ ৰূপ লয় আৰু বৰষুণ হিচাপে পুনৰ ভূ-পৃষ্ঠলৈ নামি আহে৷ পানীয়ে কোনো কেলৰি বা পুষ্টিৰ যোগান নধৰিলেও সকলো জীৱকে বিশুদ্ধ বা সুৰক্ষিত খোৱাপানীৰ প্ৰয়োজন৷ এতিয়াও বিশ্বৰ প্ৰায় ১০০ কোটি মানুহৰ বাবে বিশুদ্ধ খোৱাপানী উপলব্ধ নহয়৷ বিশুদ্ধ খোৱাপানীৰ উপলব্ধতাৰ সৈতে মুঠ জনমূৰি আয়ৰ এক পোনপটীয়া সম্পৰ্ক আছে৷ কিছুসংখ্যক পৰ্যবেক্ষকৰ মতে ২০২৫ চনলৈ বিশ্বৰ জনসংখ্যাৰ প্ৰায় আধা সংখ্যকেই জল সম্পৰ্কীয় সমস্যাৰ সন্মুখীন হ’ব৷ ২০০৯ চনৰ এক প্ৰতিবেদন মতে, ২০৩০ চনলৈ একাংশ উন্নয়নশীল অঞ্চলত পানীৰ চাহিদা ইয়াৰ যোগানতকৈ ৫০ শতাংশ বৃদ্ধি পাব৷ উদ্যোগসমূহত শীতলীকৰণৰ বাবে আৰু দ্ৰৱণ হিচাপে পানীৰ ব্যৱহাৰ হয়৷ সতেজ পানীৰ প্ৰায় ৭০ শতাংশ কৃষিকাৰ্যত ব্যৱহাৰ কৰা হয়৷

২০১১ চনৰে ২২ জুলাইত যুগুত কৰা এক প্ৰতিবেদনৰ মতে পৃথিৱীৰ পৰা ১,২০,০০০ কোটি আলোকবৰ্ষ দূৰত্বত এক বিশালকাৰ ডাৱৰ পুঞ্জৰ সন্ধান পোৱা গৈছে৷ ইয়াত নিহিত হৈ থকা পানীৰ পৰিমাণ পৃথিৱীৰ মহাসাগৰকেইখনৰ পানীৰ ১৮০ ট্ৰিলিয়ন গুণ৷